ਬੇਕਰਾਰੀਆਂ ਹੁੰਦੀਆਂ ਕੀਮਤੀ ਜੀ
ਫ਼ਾਸਲਿਆਂ ਵਿਚੋਂ ਇਤਮਿਨਾਨ ਹੋਵੇ
ਫ਼ਿਦਾ ਸਭ ਹੁੰਦੇ, ਤੂੰ ਨਿਸਾਰ ਹੋ ਜਾ
ਉਹਨੂੰ ਪਤਾ ਲੱਗੇ ਤਾਂ ਗੁਮਾਨ ਹੋਵੇ
ਦਿਲਾ ਹਾਰ ਤੇ ਸਹੀ
ਆਪਾਂ ਵਾਰ ਤੇ ਸਹੀ
ਇੱਥੇ ਹਾਰਿਆਂ ਦੀ
ਉੱਚੀ ਸ਼ਾਨ ਹੋਵੇ
ਐਸੀ ਆਸ਼ਕੀ ਕਰੀਂ ਸਰਤਾਜ ਸ਼ਾਇਰਾ
ਕੋਈ ਹੈਰਾਨ ਹੋਵੇ ਤੇ ਕੁਰਬਾਨ ਹੋਵੇ
ਐਸੀ ਇਸ਼ਕ਼ ਬਜ਼ਾਰ ਦੀ ਰੀਤ ਵੇਖੀ
ਲੱਖਾਂ ਸਾਹਵੇਂ ਤੇ ਰਸੀਦ ਕੋਈ ਨਾ
ਜਿਹਨੇ ਇਸ ਜਹਾਨ ਵਿਚ ਪੈਰ ਪਾਇਆ
ਉਹਦੀ ਘਾਮੀ ਕੋਈ ਨਾ, ਉਹਦੀ ਈਦ ਕੋਈ ਨਾ
ਇਸ਼ਕ਼ ਜਿਹੀ ਆਸਾਨ ਕੋਈ ਸ਼ੈਅ ਵੀ ਨਹੀਂ
ਇਸ਼ਕ਼ ਜਿਹਾ ਮੁਸ਼ਕਲ ਤੇ ਸ਼ਦੀਦ ਕੋਈ ਨਾ
ਓਏ ਤੂੰ ਅੰਦਰੋਂ ਹੀ ਲੱਭ ਸਰਤਾਜ ਸ਼ਾਇਰਾ
ਛੱਡ ਬਾਹਰੋਂ ਮਿਲਣ ਦੀ ਉਮੀਦ ਕੋਈ ਨਾ
ਇਹੋ ਲੁਤਫ਼ ਮੁਹੱਬਤਾਂ ਦੇ ਵੱਖਰੇ ਨੇ
ਜਦੋਂ ਦਰਦ ਹੋਵੇ ਉਦੋਂ ਹੱਸੀਏ ਜੀ
ਕਦੇ ਹੱਥਾਂ ਨੂੰ ਖੋਲ੍ਹ ਕੇ ਖੈਰ ਮੰਗੀਏ
ਕਦੇ ਤੀਸਾਂ ‘ਚ ਮੁੱਠੀਆਂ ਨੂੰ ਕੱਸੀਆਂ ਜੀ
ਕਦੇ ਪੱਤਿਆਂ ਅੱਗੇ ਗਾਈਏ ਨਜ਼ਮ ਸਾਰੀ
ਕਦੇ ਆਪੇ ਨੂੰ ਵੀ ਨਾ ਦੁੱਖ ਦੱਸੀਏ ਜੀ
ਕਿ ਇਹੀ ਇਸ਼ਕ਼ ਦੇ ਦੋ ਮੂਲ ਸਰਤਾਜ ਸ਼ਾਇਰਾ
ਮੇਹਰਮ ਜਿਵੇਂ ਆਖੇ ਓਵੇਂ ਵੱਸੀਆ ਜੀ
ਇਹ ਉਦਾਸ ਦਿਸੇ, ਇਹ ਜੋ ਗ਼ਮਜ਼ਦਾ ਏ
ਇਹ ਜੋ ਦਿਲ ਫ਼ਿਗਾਰੀਆਂ ‘ਚ ਚੂਰ ਦਿਸਦਾ
ਇਹਨੂੰ ਪੁੱਛੋ ਕਿ ਖੱਟਿਆ ਇਹ ਦਿਲਬਰੀ ‘ਚੋਂ
ਅੱਦੋਂ ਆਖੂ, ਹੁਣ ਦਿਲਬਰ ‘ਚੋਂ ਹਜ਼ੂਰ ਦਿਸਦਾ
ਇਹਨਾਂ ਸਭਕੇ ਹੀ ਇਸ਼ਕ਼ ਦੇ ਬਲਣ ਦੀਵੇ
ਇਹਨਾਂ ਕਰਕੇ ਮੁਹੱਬਤਾਂ ‘ਚੋਂ ਨੂਰ ਦਿਸਦਾ
ਕਿੱਥੇ ਖੜਾ ਏ ਸੋਚੀ ਸਰਤਾਜ ਸ਼ਾਇਰਾ
ਪੈਂਡਾ ਇਸ਼ਕ਼ੇ ਦਾ ਹਾਲੇ ਬੜੀ ਦੂਰ ਦਿਸਦਾ
ਦੋਹਾਂ ਬੇੜੀਆਂ ਵਿਚ ਵੀ ਕੀ ਪੈਰ ਧਰਨਾ
ਯਾ ਤਾਂ ਹਿਜਰ ਬਣ ਜਾ ਜਾਂ ਵਿਸਾਲ ਬਣ ਜਾ
ਕਰਕੇ ਹੌਂਸਲਾ ਵੇ ਹੋ ਜਾ ਇਕੋ ਪਾਸੇ
ਯਾ ਤਾਂ ਕੱਖ ਬਣ ਜਾ ਜਾਂ ਕਮਾਲ ਬਣ ਜਾ
ਯਾ ਤਾਂ ਨੇਹਰਿਆਂ ਨੂੰ ਸੀਨੇ ਨਾਲ ਲਾ ਲੈ
ਯਾ ਤਾਂ ਕਿਸੇ ਦੇ ਮੁਖ ਦਾ ਜਮਾਲ ਬਣ ਜਾ
ਹੋਵੇ ਰਸ਼ਕ ਤੇਰੇ ਤੇ ਸਰਤਾਜ ਸ਼ਾਇਰਾ
ਲੋਕੀ ਯਾਦ ਰੱਖਣ ਤੂੰ ਮਿਸਾਲ ਬਣ ਜਾ
ਲੋਕੀ ਯਾਦ ਰੱਖਣ ਤੂੰ ਮਿਸਾਲ ਬਣ ਜਾ
ਲੋਕੀ ਯਾਦ ਰੱਖਣ ਤੂੰ ਮਿਸਾਲ ਬਣ ਜਾ